Centro Ceferino Namunkura pegechi ruka mew, INDH Araucanía txawupey fentren che tukulpallal wiñoy trxipantu zugu, tüfa mew, kiñe küme llellipun mew amulgey ti zugu , ka femuechi pichi kimeltugey ti pu che akulu ti trawün mew chumuelu ñi llellipuken ta pu mapuche ka che mew ñi guillatugeken ta che.
Tripalu ti llellipun zugu, powitu ruka mew, amulgey kiñe nütram: feychi nütxam mew tukulpagey ti wirin zugu entulu ti trokinche “Paz ka Entendimiento” pigelu. Tüfachi zugu mew kiñeke che rakizuami, günezuami ka entuy ñi zugun egün.
Puwlu tüfachi nütxamkawün trokinche paz y entendimiento pigelu, txipay ti Mizawün, fey mu ka tripay fentxen nütxamkawün ka rakizuam chumuechi ñi mülefuy ñi zoy llamgeal pu mapuche ka nieal zoy küme mogen egün.
Kom pu che rumeñma mañumigün tüfachi txawün, ka pu gen zugu mañumtuy ñi küpan egün ka ñi küme txipan tüfachi ti txawün.
